Айсулуу Тыныбекова:Сени менен жолугуп маектешүүгө даярмын, сиңдим!

Токиодо өткөн Олимпиада оюндарынын күмүш медалынын ээси Айсулуу Тыныбекова Интернет жылдызына айланган жаш спортчу кызды издеп жатат.Бул тууралуу спортчу өзүнүн социалдык баракчасына жазганын “Барометр” билдирет.

 “Кечээ бул видеону интернеттен көрүп абдан сүйүндүм! Качан жана каерден тартылганы белгисиз, бирок бир нече жолу кандай сонун ыкманы жасаган! Сиңдибиз машыгып жүргөнү сиздерге да байкалдыбы?

Күрөштө бул ыкма үчүн эки упай берилет.Мен бул спортко жаңыдан киришип баштаганда, дал ушул ыкманы көп колдончумун. Бул кызды көрүп өзүмдү эстеп кеттим. Себеби ушул ыкма менен мен бир эл аралык мелдештен медаль утуп алгам! 

Сени менен жолугуп маектешүүгө даярмын, сиңдим! Эгер чоң спортко кадам таштайм десең багыт берүүгө даярмын. Кимде даректери болсо кабар берип коюңуздарчы”,-деп жазды балбан кыз.

Эскерте кетсек, социалдык тармактарда кичинекей кыз эркек бала менен күрөшүп жатканы тууралуу видео тараган. Анда кыз сонун ыкмаларды колдонуп баланы жеңгени көрсөтүлгөн. Соцтармактын колдонуучулары кыздын күчү менен мүмкүндүктөрүнө суктанып жатышат.Кыска убакыттын аралыгында ал Интернет жылдызына айланды.