Аида Салянова: "Мейли мени кектешсин, согушта курман болгон аталарыбызда эмне күнөө? Чал-кемпирде эмне күнөө?"

"Улуу Ата-Мекендик согушта каза болгондордун, дайынсыз жоголгондордун каза тапкан жерлери аныкталган болсо, 2 жакын тууганы мамлекеттин эсебинен барып өз мекенинин бир ууч топурагын салып көкүрөктөгү көксөөсүн кандырып келсин деген үмүттө мен жазган  мыйзам долбоору бүгүн парламентте четке кагылды”, - деп  өзүнүн Фейсбуктагы баракчасына Жогорку Кеңештин экс-депутаты Аида Салянова жазып чыкты.

Анын айтымында,  аткаминээрлер өзүнүн катасын моюнуна алгандын ордуна, тескерисинче өмүр бою бут тосуп, өч алып өтүшөт.

“Долбоордо айып жок. Кеп долбоорду жазган адамда болду. Мейли, мени кектесин, мыйзамда эмне күнөө?! Чал-кемпирлерде эмне күнөө? Азыр согушта курман болгон аталарыбыздын балдары деле өсөөрү эмес, өлөөрү калды. Алардын аталары ал жерлерге турист болуп барып өлгөн эмес. Өз каражаттары болсо, бул мыйзамды мындай зар какшап күтпөйт эле.9- май алдында күйпөлөктөгөндөн айланабызбы, биздин келечегибиз үчүн жанын берген аталарыбызды барктай албагандан кийин”, - дейт мурдагы эл өкүлү.
Аида Салянованын айтымында, өкмөттүн өкүлдөрү бул долбоорду ишке ашыруу үчүн  28 млрд сом талап кылат деп эсептешкен. 

“Сөз жөк! Уят! Андай акчаны жумшаш үчүн бардык дайынсыз болгон 56 мин жоокерди таап коюш керек! Ушундай дагы наадандык болобу!? Бүгүнку кундо Өкмөткө болгону 12 эле адам кайрылышыптыр. Ушундай министр, ушундай өкмөттүн кимге кереги бар?!”, - деп суроо салат Салянова.

Анын айтымында бул  мыйзм долбоорунун  четке кагылышаны айрым бир адамдар кызыкдар болгон.
“Бул долбоорго башында Шадиев комитеттин төрагасы катары тоскоолдук кылган. Мен башкы прокурор болуп турганда ага кылмыш иши козголгон. Ата - бабаларыбыздын арбактарына кылган мамилеси үчүн булар жакшылык деле көрбөйт. Алар үчүн көп убакыт короткум келбейт. Мени мамлекет жаштарды кантип тарбиялайт, патриотизмин кантип ойготот, баатырларыбыздын кадырын билбей алардын ордуна кимди үлгү кылып көрсөтөт деген ой түйшөлтөт”, - дейт мурдагы баш прокурор.

Ошондой эле Салянова жогорудагы постуна  бул мыйзамды үч жыл күтүп келген адамдардын сүрөтүн жүктөгөн.

Эске салсак, кечээ «Согуштун ардагердери жана тылда эмгектенгендер» тууралуу мыйзамга  өзгөртүү киргизүү тууралуу Аида Салянова демилгелеген мыйзам долбоору парламент тарабынан четке кагылган. Долбоордо, эгер согушта дайынсыз деп эсептелинген жоокердин, сөөгү кай жерде коюлгандыгы аныкталса, анда анын жакын туугандарынан 2 адамга ал жерге барып келүүгө өкмөт акча каражатын бөлүп бериши керек болчу. Бирок өкмөт 56 миң дайынсыз деп эсептелинген жоокерлерди табууга бюджеттен 28 млрд сом каражат кетээрин эсептеп, казынада андай акча жок экендигин айтып, анын натыйжасында депутаттар мыйзам долбоорун четке кагышкан.