Ат-Башыда болгон жол кырсыгынан бир адам каза таап, экөө жабыркады

Нарын областынын Ат-Башы районунда болгон жол кырсыгынан эркек киши каза тапты. Бул тууралуу Өзгөчө кырдаалдар министрлигинин басма сөз кызматынан кабарлашканын “Барометр” маалымдайт.

Аталган кабарга таянсак, Бишкек-Нарын-Торугарт жолунун 407-чакырымында Ford Mondeo унаасынын айдоочусу рулду башкара албай калып жолдон чыгып кеткен.

Кырсыктан 35 жаштагы жигит каза тапты, дагы эки адам ар кандай жаракаттарды алышты. Каза тапкан адамдын сөөгүн куткаруучулар милиция кызматкерлерине өткөрүп беришти, жабыр тарткандар жергиликтүү ооруканага жеткирилди.