Тоо аралап качып жүргөн: Дайынсыз болуп жаткан 4 киши тик учак менен Баткенге алынып келинди

Тажиктердин куралдуу кол салуусу учурунда өз үйлөрүнөн качып чыккан бойдон дайынсыз болуп жаткан 4 жаран тик учак менен Баткенге алынып келинди. Бул тууралуу ӨКМнын маалыматына шилтеме берип "Барометр" билдирет.

Маалым болгондой, Кыргыз-тажик чек арасындагы соңку куралдуу кагылыштан улам төрт адамдын дайыны чыкпай жаткан.

"Изделип жаткан адамдар кечээ, 18-сентябрда табылды.

Чек арада жайгашкан айылдардын бири – Баткен районунун Ак-Сай айылынын тургундары куралдуу кагылышуу учурунда Мойнок тоосу тарапты көздөй качып,  тоо арасында бекинип жатышкан.

Табылган 4 Ак-Сайлыктардын арасында кары адам болгондуктан да  жарандарды тик учак менен Баткенге алып келишкен", -деп айтылат маалыматта.

КР ПРЕСС-БОРБОР