Эрежени бузган кафе-ресторандар жабылат

Президент Сооронбай Жээнбеков премьер-министр менен онлайн кеңешме өткөздү. Кеңешмеде санитардык эрежени бузган коомдук жайларды жабуу сунушун Кубатбек Боронов киргизди. Бул тууралуу президенттин "Басма сөз кызматына "Барометр" билдирет. 

Бүгүн, 7-сентябрда Сооронбай Жээнбеков Кубатбек Боронов менен онлайн кеңешме өткөрдү. Өлкөнүн учурдагы эпидемиологиялык абалы, күз-кыш мезгилине даярдыктар, ошондой эле парламенттик шайлоону өткөрүү маселелери талкууланды. Премьер-министр Кубатбек Боронов коронавирус инфекциясы пандемиясы менен күрөшүүнүн жана күз-кыш мезгилине даярдык көрүүнүн алкагында ооруканаларды куруу жана оңдоп-түзөө иштери күчөтүлгөн темпте жүрүп жатканын белгиледи. 

Өкмөт башчысы коомдук транспортто жана көпчүлүк учурда эрежелерди аткарбай жаткан кафе ресторандарда санитардык талаптардын сакталышын текшерүү боюнча рейддер жүргүзүлүп жатканын билдирди. Эрежени сактабай, улам-улам буза берген кафе-ресторандарга айып пул гана эмес, жапканга чейин жоопкерчиликке тартуу сунушталды. Сооронбай Жээнбеков коронавирус инфекциясынын экинчи толкуну болбошуна эч кандай кепилдик жок экенин өзгөчө белгилеп, ага байланыштуу аймактардагы ооруканалардын курулушу менен реконструкциялоо иштерине, жаңы медициналык мекемелерди жабдууга, кошумча койко-орундарды даярдоого жана дары-дармектердин запасын камсыз кылууга көңүл бурду. 

Мамлекет башчысы парламенттик шайлоонун алдында шайлоо тилкелерин талаптагыдай техникалык жана санитардык даярдыктар менен камсыз кылуу, шайлоо мыйзамдарынын сакталышына көзөмөлдү күчөтүү зарылдыгын баса белгиледи. Ишкерликти колдоо боюнча иштерди активдештирүүнүн маанилүүлүгүн белгилөө менен  Сооронбай Жээнбеков мамлекеттик органдардын ишмердигин, калкты мамлекеттик кызмат көрсөтүүлөр менен камсыз кылууну санариптештирүү боюнча иштерди күчтөндүрүүгө, салыктык жол-жоболорду фискалдаштырууну активдештирүүгө чакырды.