Чек арада кармалган Башкы штабдын подполковниги Казакстанда бир айга камалды

Кыргызстандын Башкы штабынын У.А. аттуу подполковниги Казакстанда бир айга камалды. Бул тууралуу “Азаттык” радиосуна Башкы штабдан кабарлашкан.

Анын баш коргоо чарасын Кордай райондук соту карап, тергөө иштери бүткөнгө чейин камоо чечимин чыгарган.

Подполковник 15-октябрда “Ак жол” көзөмөл-өткөрмө бекетинен кармалган. Анын маңзат менен колго түшкөнү айтылууда. Маалыматка караганда, аны “Кыйрабас боордоштук-2017” аттуу ЖККУнун биргелешкен машыгуусуна катышып келаткан учурда казак чек арачылары колго түшүргөн.

Кыргызстандын Башкы штабы бул боюнча өзүнчө кызматтык иликтөө жүргүзүүдө.