1-абактан кат. Садыр Жапаров атасынын өлүмүнө бийликти күнөөлөдү

Садыр Жапаров атасын акыркы сапарга узата албаганына арманда болууда. Бул тууралуу ал абактан кыргызстандыктарга жолдогон катта айтылат.   

Эскерте кетсек, 20-сентябрда Садыр Жапаровдун атасы Нуркожо каза тапкан.

 Негизинен Жапаровдун катында төмөнкүлөр айтылган:

"Кагылайын калайык, карааны калдайган атакемден айрылдым. Аска-зоом кулады. Жүлүнүм зыркырап, кабыргам кайышып турат. Алакандай кезимден ардактап өстүргөн атама өз колум менен топурак сала албай кайгыга муунуп, көз жашка жуунуп турамын. Мындай күндү эч бир пенденин башына салбасын.

Элди какшаткан зулум бийлик мага жасаган адилетсиз, жалган иши менен атамдын кайгысын көбөйтүп, акыры башын жутту!

Жок дегенде кыргыздын салтын сактап, акыркы сапарда атамдын башында турууга мүмкүнчүлүк бербей, бабаларыбыздын наркына түкүрдү.

Алыс-жакындан барып, мен үчүн топурак салып, акыркы сапарга узатып койгон замандаштарымдын баарына терең ыраазычылык билдиремин.

Рахмат сиздерге.

Кош бол - Ата!

Азыр Кудайдан сабыр тилеп турамын. Бирок баары бир жүрөгүм сыздап, жүлүнүм күйүп турат. Ардактаган атамдын чекесин сылап, бир ууч топурак салсам арманым жок эле, ошону ыраа көрбөдү. Булар атанын ыйыктыгын билбейт экен. Кудай өзү таразаласын дегенден башка аргам калбады.

Бизге колунан келген азап-тозогун жасады. Мен кылмыш жасасам же элге кыянаттык кылсам бир жөн эле, тилекке каршы мамлекеттин байлыгы тонолбосун, таланбасын, өз элибизде калсын дегеним үчүн абакка жапты. Бирок акылман кыргызым мунун баары жалган жалаа экенин билип, кыянатчылык экенин көрүп турат.

Мага ошол жетиштүү.

Бул күндөр да өтөт.

"Үмүтсүз шайтан"-дейт.

Жакшы күндөр алдыда деп туралы.

Урматтуу кыргыз элим!

Камакта жатсам да мамлекетибиздин, элибиздин эртеңки тагдыры мени кайдыгер калтырбайт.

Мага жактоочум келген сайын колдоочуларым кайсы талапкерге добуш беребиз деп тынчсыздануу менен күтүп турганын билдирүүдө.

Мен азыркы шартка байланыштуу кимдир бирөөнү бөлүп көрсөткүм келбейт. Программаларын да окуганым жок.

Талапкерлердин арасынан кимиси эли-журтка чын жүрөгүнөн күйүп-бышып, башкаруу системасын түп тамырынан өзгөртүп, жаңы, эффективдүү башкарууну орнотом дегенине добушуңарды берсеңер жаңылышпайсыңар.

Ал жаңы башкаруу системасы кандай болушу керектигин 2011-жылдан бери айтып келе жатам, бирок бийликке бул система жакпайт. Анткени, дайыма элдин көзөмөлүндө болуудан коркот. Ошондой болсо да кайталап кетейин.

1) Президенттик башкаруу болуш керек. Премьер-министр деген кызмат жоюлуп, өкмөттү президент өзү жетектеш керек.

Себеби, азыр эки аппаратта баары биринин ишин бири кайталаган кызматтар. Ага 25 жыл болду. Ашыкча чыгым гана короп жатат. Президент жетишпей калат дегидей бүгүнкү күндө мамлекеттин менчигинде илгеркидей завод фабрика, мал чарбачылык, дыйканчылык жана башка өндүрүштөр тургай, бир тооккана жок. Ошол үчүн кыскартыш керек. Президент өз аппараты жана вице-президенти менен эң сонун жетишет.

Экинчиден, байпак алмаштыргансып жыл сайын бир эмес, эки премьер-министр алмаштырбай, баардык жактан толук жоопкерчиликти президент өз мойнуна алат.

2) Парламент бир мандаттуу округдардан шайланып келишип, саны 55 депутаттан ашпаш керек. Ошондо ар бир райондун эли өз өкүлдөрүн жөнөтүшөт. Алар мыйзам чыгаруу жана алардын ишке ашырылышын көзөмөлдөө менен гана алек болушу керек.

3) Токтоосуз түрдө Курултай системасын киргизиш керек. Жыл сайын өлкөбүздүн баардык айылдарынан эл тараптан коомдук башталыштарда өкүлдөр шайланып келишип, президент менен парламенттен жылдык отчёт алып туруш керек. Жылдык отчётторунун жыйынтыгына делегаттар тараптан жашыруун добуш берилиши керек. Эгер көпчүлүк добуш менен канаатандыраарлык эмес деген добуш алса, дароо отставкага кетиш керек.

Мына ушунда гана президент менен парламент жыл сайын берилуучу отчётко даярданышып, элдин көзөмөлүндө болуп, элден коркуп, эффективдуу иштей башташат. Тизгиндери элдин колунда болот. Уурдабайт. Уурдаса жыл сайын курултайда ачыкталып турат. Мына ушундай болсо президент кетсин, парламент кетсин деген митинг, пикеттер токтойт. Чыныгы элдик бийлик орнойт.

Артыбызды карайлычы, 25 жылдан бери президент же парламент эл алдында жылдык отчётум деп бердиби? Албетте берген жок. Ошондуктан, жоопкерчилик да жок болуп мамлекетибиз таланып тонолууда. Өлкөбүздүн байлыгын бөтөндөр ташып кетүүдө. Биз муну тез арада тизгиндешибиз керек.

Сот бийлиги толугу менен ак үйдөн көз карандысыз болуп, мыйзамдарга гана баш ийген система болуш керек.

Мына ушундай өзгөрүүлөр сөз жүзүндө эмес, иш жүзүндө чыныгы реформалар болгондо гана бир кишинин үй-бүлөөсүндө эмес, жалпы малекетибизде дүркүрөгөн өсүүлөр болуп, элибиз байып баштайт.

Кыскасын айтканда мына ушул сындуу өзгөрүүлөрдү жасайм, түндүк-түштүк деп бөлүнүү көйгөйүн түп тамырынан жок кылам деген талапкерге добуш берип, келечекти тандап алгыла.

Эгер бүгүнкү башкаруу системасы менен кете берсек, дагы бир 25 жылдыкта карызга кекиртегинен баткан мамлекетке айланып, жок болуп кетүү коркунучуна кептелебиз.

Урматым менен Садыр Жапаров".