Эмомали Рахмондун кудасы авариядан кайтыш болду

Тажикстан президенти Эмомали Рахмондун кудасы, суу чарба министринин мурдагы орун басары авариядан каза тапты. Бул тууралуу Борбор Азия жаңылыктар кызматы кабарлады.

Трагедия Нурек менен Дангара шаарларынын ортосундагы трассада орун алган. Камол Нуралиевдин сөөгү 23-июнда Дангарада жерге берилет.

Мамлекет башчынын кудасы 70 жашта болчу. Сегиз жыл мурун Камол Нуралиев Тажикстан суу чарба министринин орун басарлыгынан бошотулган.

Камол Нуралиевдин баласы Жамолиддин Нуралиев Тажикстан Улуттук банкынын төрага орун басары, ал президенттин экинчи кызы Озода Рахмонго үйлөнгөн. Жамолиддин Нуралиев 2015-жылга чейин алгач каржы министринин орун басары, андан соң биринчи орун басары болуп иштеген.