АКШга асыралып кеткен кыргызстандык балдар өз ата-энелерин тапкылары келет

 АКШнын жарандары тарабынан  багууга алынган жигит 18 жашка толуп өзүнүн биологиялык ата-энесин издеп жатат. Бул тууралуу бүгүн, 17-майда болгон басма сөз жыйынында  Эмгек жана социалдык өнүгүү министрлигинин үй-бүлөнү жана балдарды коргоо боюнча башкармалыгынын башчысы Жаныл Джумабаева билдирди.

 “Биз АКШда 20 күнгө командировкада болуп келдик. Бул үй-бүлөлөр менен жолугуштук, анын ичинде Даун синдрому менен ооруган эки баланы багып алган үй-бүлөгө да жолуктук. Штаттарда инклюзивдик билим берүү абдан өнүккөн, балдар аларды багып алышкан билишет жана өздөрүнүн биологиялык ата-энелери тууралуу көп суроолорду беришет. Аларга атасы менен апасы аларды жакшы көрүшөрүн бирок шарттан улам ала албай жатышканын айтышат”,-дейт Джумабаева.

 Джумабаева  АКШда  кыргызстандык балдарды асырап алган үй-бүлөлөрдүн ассоциациясы түзүлгөнүн белгилеп өттү.   

“Кичинекей кыз бизге скрипка менен Кыргызстандын гимнин ойноп берди, алардын үйүндө кыргыз желеги бар бурч уюштурулган. Америкалык ата-энелер балдарды кыргыз маданиятына тарбиялашат. Алар Ноорузду  жана 31-августту белгилешет. Балдар дискриминацияга кабылбайт”,-деп айтты адис.