Бир түндө үч эшекти уурдап кеткен жаш жигит кармалды

Нарын областынын тургуну эшек уурдоого айыпталып кармалды. Бул тууралуу Нарын областтык ички иштер башкармалыгынын басма сөз кызматынан кабарлашты.

Аталган маалыматка таянсак, Кочкор районунун ички иштер бөлүмүнө Кара-Күңгөй айылынын жашоочулары арыз менен кайрылган. Алар бир түндө эле, тактап айтканда 17-апрелден 18-апрелге караган түнү короолорундагы эшектерин уурдатып жиберишкенин маалымдашкан.

Бул факты боюнча ыкчам-иликтөө иштери башталып, кылмышка шектүү делип Кочкор районунун Кара-Саз айылынын 19 жаштагы тургуну кармалды.

Ага карата Кылмыш-жаза кодексинин 165-беренеси (мал уурдоо) боюнча кылмыш иши козголду.