Кыргызстан менен Казакстандын өкмөт башчылары сүйлөштү

Кечээ, 21-апрелде, премьер-министр Мухаммедкалый Абылгазиев жана Казакстан Республикасынын премьер-министри Бахытжан Сагинтаевдин ортосунда телефондук сүйлөшүү болду. Бул тууралуу өкмөттүн басма сөз кызматынан кабарлашты.

Телефондук сүйлөшүүнүн жүрүшүндө Казакстан Республикасынын премьер-министри Бахытжан Сагинтаев Мухаммедкалый Абылгазиевди Кыргыз Республикасынын премьер-министри кызматына дайындалышы менен куттуктап, жогорку мамлекеттик кызматында ийгиликтерди каалап кетти.

Мындан тышкары, эки өлкөнүн өкмөт башчылары достук жана өз ара түшүнүшүү принциптерине негизделген кыргыз-казак эки тараптык кызматташтыгынын актуалдуу маселелерин талкуулашты.

Тараптар өз ара пайдалуу диалогду мындан ары өнүктүрүү жана эки мамлекеттин башчылары ортосунда жетишилген макулдашууларды аткаруунун маанилүүлүгүн белгиледи.