Бишкекте өрт өчүрүүчүлөр эки адамды өрттөн сактап калышты

4-июнга караган түндө саат 00:13тө Бишкекте көп кабаттуу үйлөрдүн биринде өрт чыкты. Бул тууралуу ӨКМнын берген маалыматына шилеме берип “Барометр” билдирет.

“Бүгүн саат 00:13 түндө Бөкөнбаев көчөсүндө жайгашкан көп кабаттуу турак үйлөрдүн биринде батирдин 5 чарчы метр ички жасалгасы жана үй тиричилик буюмдары күйгөн. Өрттөн батирдин жашоочусу күйүк алып, тез жардам кызматкерлерине өткөрүлүп берилди. Дагы эки адам өрт өчүрүү кызматкерлери тарабынан куткарылып, коопсуз жерге чыгарылды.

Өрттү өчүрүүгө №3-ӨКБдан бир бөлүм тартылып, өрт саат 00:35 чектөөгө алынып, саат 00:45 толук өчүрүлдү”,- деп айтылат маалыматта.

Учурда өрттүн келип чыгуу себеби такталууда.