Базар Базаргуруевге 10 жылдан кийин Олимпиаданын коло медалын тапшырышат

Балбан Базар Базаргуруевге 2008-жылы өткөн Олимпиаданын жеңүүчүсү катары коло медаль жана акчалай сыйлыкты тапшырышат.   

Иш-чара 27-февралдан 4-мартка чейин Бишкекте өткөрүлө турган күрөш боюнча Азия чемпионатынын алкагында болмокчу. 

Базар Базаргуруев  2008-жылы Пекинде өткөн Олимпиадага  Кыргызстандын курама командасынын атынан катышып 5-орунду алган. Балбанга бул үчүн мамлекеттен 15 миң сом өлчөмүндө сыйлык берилген. 

2017-жылы Күрөштүн бириккен дүйнөсү Пекинде күмүш утуп алган украиналык спортчунун канынан кайра текшерген учурда допинг табылып сыйлыгынан ажыратылганын маалымдаган.

Базаргуруев ушундан соң 3-орунга жылды жана 9 жыл өткөндөн кийин Олимпиада оюндарынын коло байгесинин ээси болуп калды.   

Ошол жылы өткөн Олимпиаданын коло медалынын ээси Руслан Түменбаевге «Данк» медалы, 75 миң доллар жана Mitsubishi Pajero 4 унаасы берилген.